У апошні раз у гэтым годзе байцы студэнцкіх будаўнічых атрадаў, якія працавалі на Беларускай АЭС і будуемых аб'ектах горада, а таксама запрошаныя госці сабраліся ў кінаканцэртнай зале, каб развітацца з горадам маладосці - так яны назвалі Астравец.
- Сёння трохі незвычайны дзень: з усмешкай на вуснах і павалокай суму ў вачах, - адзначыла камандзір рэспубліканскага штаба студэнцкіх атрадаў ЦК ГА БРСМ Надзея Шахоўская. - Сёння вы раз'едзецца па хатах, але , спадзяюся, не забудзецеся насычаны разнастайнымі падзеямі час, праведзены ў горадзе маладосці. Дзякуй усім удзельнікам Усебеларускай маладзёжнай будоўлі, мясцовай уладзе, якая падала нам месцы для правядзення вольнага часу, працадаўцам, якія прымаюць нас, давяраюць рознага віду работы і клапоцяцца, як пра сваіх дзяцей.
У сваю чаргу намеснік генеральнага дырэктара па ідэалагічнай працы, кадрах і сацыяльных пытаннях ТАА «Гроднапрамбуд» Аляксей Равяка выказаў удзячнасць студатрадаўцам за працу і ўручыў лепшым «байцам» граматы і грашовыя прэміі.
За два месяцы хлопцы не толькі працавалі на аб'ектах Астраўца і Беларускай АЭС, але і ўдзельнічалі ў розных мерапрыемствах: творчыя конкурсы, святы, інтэлектуальныя і спартыўныя спаборніцтвы. На закрыцці былі агучаны іх вынікі, а пераможцы атрымалі граматы і прызы. Больш за ўсё аказалася ў студатрада «Эўрыка» - ён жа стаў і лепшым атрадам Усебеларускай маладзёжнай будоўлі па сукупнасці ўсіх паказчыкаў.
Кожны з атрадаў прадэманстраваў жартоўная відэа, як ім працавалася і жылося ў Астраўцы. Завяршэннем ўрачыстага мерапрыемства стала фінальная песня «Горад маладосці». Расставацца заўсёды нялёгка, але праз год на Усебеларускай маладзёжнай будоўлі зноў будуць рады прыняць байцоў. Таму многія з іх казалі Астраўцу не «бывай», а «да пабачэння».
