Кіраўнік Мінэнерга распавёў аб асноўных кірунках павышэння энергетычнай бяспекі Беларусі, мерах па дыверсіфікацыі паліўна-энергетычнага балансу краіны.
Ключавым праектам ён абазначыў будаўніцтва атамнай электрастанцыі. Беларусь стала першай замежнай пляцоўкай, дзе дзяржкарпарацыя «Расатам» пабудавала АЭС з вода-вадзянымі рэактарамі трэцяга пакалення павышанай бяспекі. У 2021 годзе ўведзены ў прамысловую эксплуатацыю першы энергаблок станцыі, увод у работу другога энергаблока плануецца ў бягучым годзе.
Перавагі выкарыстання мірнага атама ўжо адчувальныя і даюць эканамічны эфект. З моманту ўключэння першага блока БелАЭС у аб'яднаную энергасістэму (3 лістапада 2020 года) да яго вываду ў планава-папераджальны рамонт (25 красавіка 2022 года) выпрацавана 9,3 млрд. кВтг электраэнергіі, што дало магчымасць замясціць каля 2,3 млрд.м куб. прыроднага газу.
З уводам другога энергаблока БелАЭС павялічыць аб'ём вытворчасці электраэнергіі да 18,5 млрд. квтг у год. Станцыя дасць магчымасць штогод замяшчаць каля 4,5 млрд. куб.м. прыроднага газу, знізіць на 7 млн. тон у год выкіды парніковых газаў. «З запускам БелАЭС долю прыроднага газа ў энергабалансе Беларусі плануецца знізіць да 60%», - адзначыў Міністр.
Яшчэ адным напрамкам, важным для дыверсіфікацыі энергабалансу, стала развіццё аб'ектаў аднаўляльнай энергетыкі. Іх устаноўленая магутнасць за апошнія 6 гадоў у Беларусі вырасла ў 5 разоў - са 120 да 600 МВт, выпрацоўка электраэнергіі - з 270 да 1 260 млн. кВтг.
