Тэма Сусветнага дня ў 2022 годзе – «Агульнымі намаганнямі сфарміраваць пазітыўную культуру аховы працы». Яна падкрэслівае значэнне сацыяльнага дыялогу і ўцягнутасці ўсіх зацікаўленых бакоў для фарміравання пазітыўнай культуры аховы працы.
Наяўнасць надзейнай сістэмы аховы працы, якая функцыянуе пры актыўным удзеле ўсіх зацікаўленых бакоў на нацыянальным узроўні і на ўзроўні прадпрыемстваў, адыгрывае найважнейшую ролю ў захаванні нармальных умоў працы і забеспячэнні бяспекі і здароўя работнікаў.
Сацыяльны дыялог не толькі садзейнічае выпрацоўцы больш эфектыўнай палітыкі і стратэгіі ў галіне аховы працы, але і ўносіць вырашальны ўклад ва ўмацаванне адказнасці і зацікаўленасці бакоў, садзейнічаючы тым самым аператыўнай і больш эфектыўнай рэалізацыі прынятых рашэнняў.
Пазітыўная культура аховы працы на працоўных месцах азначае, што як кіраўніцтва, так і работнікі шануюць бяспечнае і здаровае вытворчае асяроддзе і прыкладаюць намаганні да яго забеспячэння. Пазітыўная культура аховы працы будуецца на ўцягнутасці, якая азначае актыўны ўдзел усіх бакоў у пастаянным умацаванні аховы працы. Там, дзе забяспечана высокая культура аховы працы, работнікі не саромеюцца выказваць заклапочанасць магчымымі пагрозамі для сваёй бяспекі і здароўя або вытворчымі рызыкамі, а адміністрацыя праяўляе ініцыятыву ў плане сумеснага з работнікамі пошуку абгрунтаваных, эфектыўных і надзейных рашэнняў узнікаючых праблем. Неабходная для гэтага ўмова - адкрыты абмен інфармацыяй і дыялог, пабудаваны на даверы і ўзаемнай павазе.
На Беларускай АЭС цвёрда перакананы ў тым, што бяспека павінна пачынацца з першага кроку праз турнікет КПП прадпрыемства. Існуе памылка, што вытворчасці без траўматызму не бывае. Насамрэч гэта не так. Можна і трэба імкнуцца да дасканалай бяспекі і нулявога траўматызму. Мэта «нуль» дасягальна. І не толькі кароткачасова. Трэба імкнуцца дасягаць яе стабільна. Гэта магчыма за кошт канкрэтных дзеянняў кожнага работніка.
«Бяспека без кампрамісаў» для дзяржаўнага прадпрыемства «Беларуская АЭС» гэта не проста лозунг, а мадэль паводзінаў кожнага. На прадпрыемстве праводзіцца пастаянная работа, накіраваная на прадухіленне няшчасных выпадкаў, а таксама сітуацый, у якіх могуць узнікнуць рызыкі.
Адным з асноўных напрамкаў вытворчай дзейнасці, якая забяспечвае бяспеку, надзейнасць і эфектыўнасць работы прадпрыемства, з'яўляецца работа з персаналам па ахове працы, якая ўключае вывучэнне і прымяненне перадавых бяспечных прыёмаў вытворчасці работ, выхаванне ў персаналу адказнасці за выкананне правіл, норм і інструкцый па ахове працы.
