На мерапрыемствах абітурыенты даведаліся пра перавагі, якія дае атамная адукацыя, і перспектывах кар'ернага росту ў гэтай сферы. Таксама ў ВНУ супрацоўнікамі Інфармацыйнага цэнтра па атамнай энергіі горада Мінска былі арганізаваны інтэрактыўныя пляцоўкі, дзе можна было пазнаёміцца з уладкаваннем і прынцыпам работы атамных станцый, здзейсніць віртуальную экскурсію па Беларускай АЭС і паўдзельнічаць у віктарынах і інтэрактыве па тэме мірнага выкарыстання атамных тэхналогій.
Госцем БНТУ быў дырэктар Дэпартамента па ядзернай энергетыцы Міністэрства энергетыкі Беларусі Васіль Палюховіч. Пад час сустрэчы кіраўнік ведамства адзначыў, што развіццё атамнай галіны з'яўляецца стратэгічным напрамкам для Беларусі. Шмат у чым поспех тут залежыць ад якаснай падрыхтоўкі высокакваліфікаваных кадраў. "У апошнія некалькі гадоў у Беларусі расце цікавасць да атамных прафесій. Рыхтаваць кадры для атамнай галіны Беларусь пачала ў 2008 годзе, і за гэты час атрымалі адукацыю ў гэтай сферы парадку 1 тыс. спецыялістаў. Праграма падрыхтоўкі пастаянна ўдасканальваецца і пашыраецца, зусім нядаўна ў БНТУ , напрыклад, адкрылася новая спецыяльнасць - "праектаванне і эксплуатацыя АЭС". Створаная сістэма падрыхтоўкі кадраў здольна забяспечыць неабходнымі спецыялістамі ўсе арганізацыі галіны, а таксама бяспечную эксплуатацыю Беларускай АЭС, - адзначыў Васіль Палюховіч. - Мы разумеем, што кваліфікаваныя кадры - гэта каштоўнасць на ўсе часы. Адзначу, што спецыяльнасць атамшчыка запатрабаваная і прэстыжная не толькі ў нашай краіне, але і за мяжой. Нельга выключаць, што ў хуткім часе беларускія спецыялісты будуць дастойна прадстаўляць краіну на пляцоўках атамных станцый па ўсім свеце".
Асноўная частка выпускнікоў, якія скончылі атамную школу, размяркоўваецца на Беларускую АЭС. Таксама сярод працадаўцаў - цеплавыя электрастанцыі, Дзяржатамнагляд, Нацыянальная акадэмія навук, "Белнiпіэнергапрам", Рэспубліканскі навукова-практычны цэнтр анкалогіі і медыцынскай радыялогіі ім. Н.Н.Аляксандрава, "Атамтэх", прыватныя прадпрыемствы.
Начальнік аддзела вучэбна-метадалагічнага забеспячэння вучэбна-трэніровачнага цэнтра Беларускай АЭС Георгій Шпунтаў распавёў аб працэсе навучання для атамшчыкаў. "Падрыхтоўка спецыялістаў-атамшчыкаў адмысловая, яна ўключае не толькі дакладныя навукі, але і лагічную падрыхтоўку, навучанне самастойнасці ў прыняцці рашэнняў і адначасова ўменню працаваць у камандзе. Можна сказаць, што вучоба працягваецца на працягу ўсёй працоўнай дзейнасці. Для пастаяннага павышэння кваліфікацыі спецыялістаў на БелАЭС уведзены ў эксплуатацыю вучэбна-трэніровачны цэнтр, дзе ўсталяваны поўнамаштабны трэнажор для навучання персаналу блокавага пульта кіравання і іншыя лакальныя трэнажоры. Арганізавана сістэма пастаяннага павышэння кваліфікацыі з прыцягненнем магчымасцяў нашых замежных партнёраў", - адзначыў Георгій Шпунтаў.
Беларуская АЭС актыўна супрацоўнічае з профільнымі ВНУ краіны па падборы будучых спецыялістаў і з гэтай мэтай дае магчымасці для праходжання вытворчай і пераддыпломнай практыкі ў падраздзяленнях АЭС. Студэнты старэйшых курсаў беларускіх ВНУ рэгулярна праходзяць вытворчую практыку ў рэальным рабочым асяроддзі Беларускай АЭС, абараняюць дыпломныя працы па тэматыцы, звязанай з ядзернай энергетыкай; выпускнікі ахвотна атрымліваюць размеркаванне на АЭС.
Многія работнікі БелАЭС прайшлі стажыроўку на дзеючых атамных станцыях у Расіі. Працягласць такіх стажыровак дасягала два месяцы, каб беларускія спецыялісты ў поўнай меры змаглі пераняць вопыт калег. "У Расіі назапашаны каласальны вопыт па бяспечным выкарыстанні атамнай энергетыкі, і мы заўсёды адкрыта гатовы ім дзяліцца, - адзначыў віцэ-прэзідэнт АТ ІК "АСЭ", дырэктар праекта па ўзвядзенню Беларускай АЭС Віталь Палянiн. - Акрамя таго, Беларусь як краіна, якая стала на шлях развіцця атамнай энергетыкі, выдатна ўсведамляе важнасць самастойнай падрыхтоўкі кадраў для атамнай галіны. Я магу ацаніць высокі прафесіяналізм калег, з якімі мне давялося працаваць на пляцоўцы БелАЭС. Упэўнены, што вопыт цяперашніх і будучых беларускіх атамшчыкаў і ў цэлым тых, хто вырашыць звязаць сваю кар'еру з ядзернымі тэхналогіямі, будзе запатрабаваны не толькі ў сваёй краіне, але і на міжнародным узроўні. Напрыклад, толькі "Расатам" сёння будуе 35 блокаў у 12 краінах. Так што попыт на атамныя кадры быў і будзе заўсёды ".
