"Сёння прайшлі планавыя мерапрыемствы, якія паказалі поўную гатоўнасць усіх сіл. Усё гэта робіцца ў рамках, узгодненых з МАГАТЭ, і строга па тых правілах, якія нам прадпісваюцца. Вучэнні паказалі, што ўсе службы гатовыя ў выпадку ўзнікнення пазаштатных сітуацый прыняць усе меры для ліквідацыі НС", - сказаў Уладзімір Кухараў.
Міністр па надзвычайных сітуацыях Уладзімір Вашчанка падкрэсліў, што вучэнні ў гэтай сферы праводзяцца па ўсёй краіне. "Тут удзельнічаюць перш за ўсё сілы і сродкі падсістэмы (падсістэмы дзяржаўнай сістэмы папярэджання і ліквідацыі надзвычайных сітуацый. - заўвага БЕЛТА) Гродзенскай вобласці. Мы бачым, што гатоўнасць высокая. Першыя буйнамаштабныя вучэнні былі праведзены ў 2017 годзе. Тут сёння тая ж праца праведзена, актыўна працавалі службы МНС, на атамнай станцыі падрыхтаваны персанал. Нягледзячы на тое, што запуску станцыі яшчэ не было, людзі гатовыя працаваць у любой сітуацыі, - канстатаваў Уладзімір Вашчанка. - Працавала камісія Гродзенскай вобласці, уся інфармацыя перадавалася ў цэнтр аператыўнага ўпраўлення МНС, адпаведна інфармавалася камісія па НС пры Саўміне. І, вядома ж, уся інфармацыя паступае прэм'ер-міністру, пры неабходнасці будзе праінфармаваны кіраўнік дзяржавы".
Міністр энэргетыкі Беларусі Віктар Каранкевіч дадаў, што выразна і зладжана былі арганізаваны дзеянні на самой АЭС. "Было арганізавана ўзаемадзеянне з сітуацыйнымі цэнтрамі, у тым ліку з маскоўскім. Усе службы працуюць выразна, зладжана", - сказаў міністр.
У Астравецкім раёне прайшло дэманстрацыйнае вучэнне па рэагаванні на радыяцыйныя аварыі з задзейнічаннем сістэмы апавяшчэння. Ставілася задача ўдасканаліць зладжанасць і аператыўнасць дзеянняў пры ўзнікненні НС, выпрацаваць кіраўніцкія рашэнні і інфармацыйнае ўзаемадзеянне.
Персанал АЭС прадэманстраваў дзеянні па лакалізацыі і ліквідацыі аварыі на рэактарным абсталяванні, эвакуацыю і сховішча ў ахоўных збудаваннях, функцыянаванне крызіснага цэнтра і інфармацыйнае ўзаемадзеянне. Падраздзяленні МНС ліквідавалі ўмоўны пажар склада дызельнага паліва падчас аварыйнай абстаноўкі.
Былі задзейнічаны звыш 270 чалавек і больш за 40 адзінак тэхнікі, уключаючы сілы і сродкі МНС, МУС, Мінабароны, Дзяржпамежкамітэта, Міністэрства аховы здароўя і іншых арганізацый, а таксама падраздзяленняў дзяржкарпарацыі «Расатам».
Праводзячы вучэнне, Беларусь дзейнічае ў строгай адпаведнасці з рэкамендацыямі Міжнароднага агенцтва па атамнай энергіі і зыходзіць з безумоўнай прыярытэтнасці забеспячэння бяспекі пры рэалізацыі нацыянальнай ядзернай энергетычнай праграмы.
